Âh mine'l-‘aşk ve hâlâtihi

 

 

[  Hararetiyle kalbimi yakıp kavuran aşkın elinden ve onun (türlü) hâllerinden (çektiklerim)...]

1- Tesdîs (Müfte‘ilün Müfte‘ilün Fâ‘ilün)

Bezme kadem bassañ ey ârâm-ı cân
Pâyıña yüz sürse o dem ‘âşıkân
Eylemeyüp dâg-ı derûnum nihân
‘Aşk ile bu beyti okurdum hemân
 Âh mine'l-‘aşk ve hâlâtihi
 Ahraka kalbî bi-harârâtihi

2

Mey yerine rûz u şeb ey verd-i ter
Nûş iderim ‘aşk ile hûn-ı ciger
Yandıgımıñ aslı bu şâm u seher
Fikr-i hayâliñ beni mecnûn ider
Âh mine'l-‘aşk ve hâlâtihi
Ahraka kalbî bi-harârâtihi

3

Hayli zamân ‘aşk ile ey gonca leb
Nâle vü efgânıma olduñ sebeb
Cân u dilim ‘aşkıñ ile yandı hep
Şimdi bu beyti okurum rûz u şeb
Âh mine'l-‘aşk ve hâlâtihi
Ahraka kalbî bi-harârâtihi

4

Görse gözüm dîdesi mestâneyi
Hayret alur yanıcı pervâneyi
Toldururum kan ile hum-hâneyi
Ferş iderim eşk ile mey-hâneyi
Âh mine'l-‘aşk ve hâlâtihi
Ahraka kalbî bi-harârâtihi

5

Baglanıladan beri gîsûsına
Mâ’ilim ol dîde-i âhûsına
Pek bakamam gamze-i câdûsına
Hû çekerim ol siyeh ebrûsına
Âh mine'l-‘aşk ve hâlâtihi
Ahraka kalbî bi-harârâtihi

6

Pâdişehim zulmini efzûn ider
Dîdeleri ‘âşıka efsûn ider
Hasret ile bagrımı pür-hûn ider
Bir gün o ‘uşşâkını mecnûn ider
Âh mine'l-‘aşk ve hâlâtihi
Ahraka kalbî bi-harârâtihi

7

Âteş-i dîdârıña yandı göñül
‘Aşk ile gafletden uyandı göñül
Eşk ile al kana boyandı gönül
Cevr ile cânından usandı gönül
Âh mine'l-‘aşk ve hâlâtihi
Ahraka kalbî bi-harârâtihi

8

Dikkat ile bir gün o çeşm-i siyâh
‘Âşık-ı bîmârına itdi nigâh
Kâ’ilim olsam da aña hâk-i râh
Yakdı ciger-gâhımı âh âh âh
Âh mine'l-‘aşk ve hâlâtihi
Ahraka kalbî bi-harârâtihi

9

Olmuş iken dîdeleriñ gibi mest
Alnıma yazıldı bu rûz-ı elest
‘Aşk ile âh oldı gönül mey-perest
Eylediñ âyîne-i kalbim şikest
Âh mine'l-‘aşk ve hâlâtihi
Ahraka kalbî bi-harârâtihi

10

Hasret ile olalı hâmûş âh
Zehr-i firâk eyliyorum nûş âh
Eyleme Leylâ'yı ferâmûş âh
‘Arz idiyor hâlin o medhûş âh
Âh mine'l-‘aşk ve hâlâtihi
Ahraka kalbî bi-harârâtihi

Leylâ Hanım

**

(Tesmîn-i Beyt-i Meşhûr-ı Mevlânâ)

(Müfte‘ilün Müfte‘ilün Fâ‘ilün)  

 

Levha-i dilde ben o şâhen-şehi
Seyr idüp oldum o zamân vâlihi
Geşt iderek deşt-i kazâda rehi
Eyledi âhım kara mihr ü mehi
Âhımı zann eylediñ ammâ tehî
Nâle vü feryâd eser eyler gehî
Âh mine'l-‘aşk ve hâlâtihi
Ahraka kalbî bi-harârâtihi

2
‘Aşka uyup bir nice dîvâneler
Zerre tehî kalmadı mey-hâneler
Toldı mey-i eşk ile peymâneler
Nûş idiyor ‘âşık-ı mestâneler
‘Aşk ile söndi nice biñ hâneler
Agladı bu derd ile çok analar
Âh mine'l-‘aşk ve hâlâtihi
Ahraka kalbî bi-harârâtihi

3
Sînecigim gülşen-i derd oldı âh
Hûn-ı dilimdir aña berg-i giyâh
Eşk-i terimle sularım gâh gâh
Seyrine geldikde o çeşm-i siyâh
Eylemedi cism-i nizâra nigâh
Cânımı hem ‘ömrimi kıldı tebâh
Âh mine'l-‘aşk ve hâlâtihi
Ahraka kalbî bi-harârâtihi

4
Bâde-i hicrânıña kandı göñül
Zehr içerek kana boyandı göñül
Bülbül uyanmadan uyandı göñül
Uyhu uyumaga utandı göñül
‘Aşkı mahabbet gibi sandı göñül
Bilmeyerek âteşe yandı göñül
Âh mine'l-‘aşk ve hâlâtihi
Ahraka kalbî bi-harârâtihi

5
Gamzeleriñ teşne olup kanıma
Gelme füsûn ile benim yanıma
Sehmiñi urma dil-i vîrânıma
Soñra gözüñ kasd ider îmânıma
Merhamet it çâk-ı girîbânıma
Eyle kerem kıyma benim cânıma
Âh mine'l-‘aşk ve hâlâtihi
Ahraka kalbî bi-harârâtihi

6
Yagmaladıñ nakd-i dili ey perî
‘Aşk ile Leylâ'yı idüp serserî
Lutf u mürüvvetle geleydüñ beri
Râhıña kurbân ider idim seri
Neyleyeyim silmediñ eşk-i teri
Âhım eger ‘arşa çıkarsam yeri
Âh mine'l-‘aşk ve hâlâtihi
Ahraka kalbî bi-harârâtihi

Notlar:

Leylâ Hanım, Hz. Mevlânâ'nın ünlü dizelerinden olan “Âh mıne'l-‘aşk ve hâlâtihi/Ahraka kalbî bi-harârâtihi”  şeklindeki beytinin üzerine 6 dize eklemek suretiyle oluşturduğu tesmînin de Mevlânâ'nın takipçisidir.

Not: Bazen Büyük Dosyaları tarayıcı açmayabilir...İndirerek okumaya Çalışınız.

Benzer Yazılar